Ikkje forstyrr villreinen
Vinteren i år er særleg krevjande for villrein. Regn med påfølgjande frost har ført til at store beiteområde i høgheia har isa ned. Villrein trekk då gjerne ut mot lågareliggjande område for å finna beite, område der dei normalt er sjeldan å sjå. Villreinen slit altså med å finna mat og treng å bevega seg fritt, med minst mogleg forstyrringar. Me oppmodar om å syne særleg varsemd om du ferdast i villreinområde.
Her er dei generelle villreinvettreglane:
- Ikkje forstyrr villreinen; vel eit anna område dersom det er kjent at det er villrein i området du hadde tenkt å vitja.
- Unngå å ferdast i villreinområde under kalvinga i mai; nokre stader er det ferdselsforbod.
- Følg merka løyper.
- Ha kontroll på hunden og undersøk lokale reglar for bandtvang.
- Hald deg i ro viss du ser villrein, slik at den kan trekka unna uforstyrra.
- Bruk kikkert og hald god avstand.
Publisert av Elisabeth Bjørkhaug
Publisert 28.02.2024 14.20