Politikk og administrasjon frå Stavanger og Suldal kommune midt i krafta
Suldal kommune
Me lukkast eller mislukkast som region
Ordførar i Suldal kommune, Mads Drange, peika i møtet på at energi, næringsutvikling, rekruttering og attraktivitet heng tett saman – og at dette krev samarbeid på tvers av kommunegrenser.
– Me lukkast eller mislukkast som region. Skal me skapa nye arbeidsplassar og berekraftig verdiskaping, må me jobba saman og sjå heile regionen under eitt, understreka Drange.
Også ordførar i Stavanger kommune, Tormod Losnedal, løfta fram verdien av besøket og gav uttrykk for at han sette pris på moglegheita til å bli betre kjent med Ryfylke-regionen og få meir innsikt i vasskraftproduksjonen i Noregs største vasskraftkommune.
Grå areal – grøne moglegheiter. Berakvam peikar framover.
Suldal kommune
Frå kyst til fjell – næring og utvikling
Programmet starta på Jelsa, der delegasjonen vart henta etter ankomst med hurtigbåt. Undervegs fekk deltakarane orientering om Tønnefabrikken og potensialet for støttenæringar knytt til vidare industriutvikling.
Vidare gjekk turen til Berakvam og Mibau Stema, der Suldal kommune presenterte planar for utvikling av nye næringsareal. Her ligg det til rette for grøn og sirkulær næringsutvikling, mellom anna innan kraftkrevjande industri, landbasert havbruk og utnytting av restressursar og spillvarme.
Det vart òg gitt orientering om planlagt datasenteretablering på Tysingvatn, før dialog og lunsj på Suldal kommunehus.
Lyse, eigarskap og framtidig kraftutbygging
Stavanger kommune er største eigar i Lyse, noko som gjer samarbeidet mellom kommunane særleg viktig i energispørsmål. Lyse, saman med Hydro, planlegg ei omfattande oppgradering og utviding av kraftproduksjonen i Røldal–Suldal Kraft.
Planane omfattar bygging av fleire nye kraftverk og ei meir enn dobling av effekten, for å kunna levera meir fornybar kraft i periodar med høgt behov. Med ein investeringsramme på om lag 8–9 milliardar kroner er dette den største kraftutbygginga i Noreg sidan 1980-talet – og eit tydeleg døme på den strategiske rolla Suldal spelar i det nasjonale energisystemet.
I hjartet av norsk energiproduksjon – Noregs største kraftverk gjer inntrykk.
Suldal kommune
Sterkt inntrykk i Kvilldal kraftverk
Dagen vart avslutta med omvising i Kvilldal kraftverk, Noregs største kraftverk og ein sentral del av Ulla-Førre-anlegget, Nord-Europas største vasskraftsystem.
Kraftverkssjef Bjørn Sandvik formidla historia bak utbygginga, dei tekniske løysingane og den store fleksibiliteten kraftverket gir i energisystemet. Dimensjonane og produksjonskapasiteten gjorde tydeleg inntrykk på delegasjonen.
Eit felles ansvar framover
Besøket stadfesta eit sterkt grunnlag for vidare samarbeid mellom Suldal og Stavanger. Trass i ulik storleik har kommunane felles interesser knytt til energi, eigarskap, arbeidsmarknad og regional utvikling.