Bakgrunn for endringa
Øyvind Stueland
Omega 365 design
Samanslåinga skjer i samband med at tidlegare einingsleiar for Kultur gjekk av med pensjon. Ved slike naturlege avgangar vurderer kommunen alltid om det er rom for å tenkje nytt og sjå på heilskapen i tenestene. Samtidig står Suldal kommune overfor endringar i oppgåveomfang ved Introsenteret, då kommunen framover skal ta imot færre flyktningar. Dette gir mindre arbeidspress og gjer det naturleg å vurdere ei samorganisering.
– Vi ser store gevinstar ved å samle fagområda kultur og integrering. Det gir rom for tettare samarbeid, felles prosjekt og betre ressursutnytting, seier kommunalsjef kultur og samfunnsutvikling Øyvind Stueland.
Den nye eininga vil ha ansvar for eit breitt spekter av tenester, frå vaksenopplæring og introduksjonsprogram til kulturskule, bibliotek og idrett. Vaksenopplæringa blir vidareført som ei avdeling i den nye eininga.
Endringa er resultatet av ei grundig vurdering frå ei prosjektgruppe med brei medverknad frå leiarar, tillitsvalde og tilsette. Prosjektgruppa har peikt på at samanslåinga vil gi:
- Større fleksibilitet i bruk av ressursar
- Betre arbeidsvilkår for tilsette
- Auka samarbeid på tvers av fagområde
- Styrka innsats for inkludering og samfunnsutvikling
Den nye einingsleiaren får fullmakt til å gjennomføre vidare arbeid med organisering og lokalisering, og det blir etablert ein overgangsplan for å sikre god implementering.
Kaspar Nilsen blir einingsleiar
Ved samanslåinga av Kultur og Introsenteret har kommunen gjort ei heilskapleg vurdering av leiarfunksjonen. Sidan det er snakk om ei samanslåing av to eksisterande einingar, og ein av leiarane allereie er tilsett, lyser ikkje kommunen stillinga ut eksternt.
Kaspar Nilsen blir difor einingsleiar for den nye eininga. Han har vore leiar ved Introsenteret i 5 år, og har det siste året også hatt ansvar for Kultur. Med relevant utdanning og solid leiarerfaring vurderer kommunen at dette er ei god og framtidsretta løysing.