Bergjunker
Suldal Foto, Jarle Lunde
Raudlista artar
Norsk raudliste for artar 2021 er ei oversikt over artar som har ei risiko for å døy ut i Norge. Her blir artane plassert i kategoriar etter kor alvorleg situasjonen for arten er. Dei mest alvorlege kategoriane er “kritisk trua” (CR), “sterkt trua” (EN) og “Sårbar” (VU), i tillegg til “Regionalt utrydda” (RE), som er lite brukt då den kategorien inneheld svært få artar. Ellers har me også kategoriane “Nær trua” (NT) og datamangel (DD).
I Suldal er det til saman registrert 341 raudlisteartar i dei ulike kategoriane. Av pattedyr kan me nemna gaupe (EN), jerv (EN) og villrein (NT). Ask (EN), alm (EN), bergjunker (VU), rødsildre (NT) og reinrose (NT) er eksempel på nokre av dei raudlista plantane me har i kommunen. Raudlista fuglar er det også mange av. Hønsehauk (VU), hubro (EN), ærfugl (VU) og fleire sjøfuglar for å nemna nokre få. Skumkjuke (EN) er ein sjeldan sopp som er funne nokre få stader. Villaks (NT) og elvemusling (VU) er raudlista artar som held til i nokre av vassdraga våre.
Utvalde naturtypar og prioriterte artar
Gjennom naturmangfaldlova, kan nokre naturtypar få status som «utvalde naturtypar». Dei har også ein eigen forskrift: «Forskrift om utvalgte naturtyper». Dette inneber at desse naturtypane (utanfor verneområde) skal tas særskilt omsyn til. Føremålet med forskrifta er at det skal vere eit verkemiddel for å sikre ivaretaking av spesielt sjeldne, viktige eller verdifulle naturtypar. Berre 8 naturtypar har denne statusen. I Suldal kommune er dei utvalde naturtypane hole/gamle eiker slåttemark og slåttemyr registrerte.
Prioriterte artar har på same måte som utvalde naturtypar, fått ein ekstra beskyttelse gjennom naturmangfaldlova. 14 artar har denne statusen i Norge i dag, men det finst få til ingen kjende registreringar av desse i Suldal kommune. Fjellrev er observert, men har ikkje ein stor bestand i kommunen.