Viltforvaltning

Det er villrein i store delar av fjellområda i kommunen. Desse områda inngår i villreinområda i Setesdal Ryfylke og i Skaulenområdet.  

Villrein er ein ansvarsart for Norge. Me forvaltar dei siste livskraftige bestandane av den opphavelege ville fjellreinen i Europa.  

Setesdal Ryfylke villreinområde er eit nasjonalt villreinområde. Området er til dårleg kvalitet etter kvalitetsnorm for villrein og dermed ikkje godkjend. Det skal derfor gjennomførast tiltak for å betre situasjonen. Årsaka til at villreinområde ikkje tilfredsstillar måla i kvalitetsnorma er samansett, men sentralt er at vegar og vasskraftutbygging i kombinasjon med ferdsel i utsette områder, har stor negativ effekt på villreinens vandringsmoglegheiter.  

Det er generelt auka fokus på arealforvaltning som ein viktig strategi for å ta vare på villreinen som art på lang sikt. I kommuneplanen sin arealdel er det lagt inn omsynssone for villrein. 

Les meir om Setesdal Ryfylke villreinområde 

Les meir om Skaulen Etnefjell villreinområde 

På oppdrag frå Statsforvaltaren i Agder har Suldal kommune sekretariat for Villreinnemnda for Setesdalsområdet. Den statlege nemnda består av 18 politisk valde medlemmer frå kommunane med areal i Setesdal Ryfylke, Setesdal Austhei og Våmur Roan villreinområde.  

Villreinnemnda sine oppgåver er mellom anna å godkjenne vald, teljande areal, bestandsplanar og fastsetje årlege fellingskvotar.  Nemnda deltek også i arealforvaltninga i fylke og kommunar med sikte på bevaring og berekraftig forvaltning av villreinen sine leveområde. Ein kan seie at villreinnemnda både er villreinen sin myndigheitsutøvar og villreinen sitt talerøyr.

Suldal kommune er ein del av det interkommunale hjorteviltutvalet saman med kommunane Bokn, Etne, Haugesund, Karmøy, Sauda, Sveio, Tysvær og Vindafjord. Det har blitt utarbeida ein felles forvaltningsplan med mål for heile Haugalandet.  

Kommunens ansvar knytt til hjortevilt:

• Utarbeide målsettingar for forvaltning av artane  
• Fastsette minsteareal  
• Tildele fellingstillatingar på elg, hjort og rådyr.  
• Arbeide for å sikra berekraftige hjorteviltbestandar, som ikkje gir uakseptable ulemper for andre samfunnsinteresser
• Godkjenne vald, bestandsplanar og bestandsplanområder  
• Ivareta jaktrettshavarens rettigheitar  

I Suldal kommune er det skotpremie på rev. Føremålet med skotpremie på rev er å førebyggje at lam på beite blir tatt av reven, samt  å auke småviltbestanden.  

Skotpremien for rev er 400 kroner.  

For å få utbetalt skotpremien, må ein levera inn fire labbar til kommunen.  

Det er jakttid mellom 15. juli og 15. april.