16 Opphald
Mynde til å gi dispensasjon frå det ordinære opphaldstilbodet er delegert kommunedirektøren.
16.1 Plasstilbod:
Suldal kommune gir tilbod om slike plassar:
- 3 dagar i veka
- 4 dagar i veka
- 5 dagar i veka
Dersom det er ledig kapasitet i barnehagen kan ein kjøpa einskilddagar. Barnet må då ha plass i barnehagen. Søknad kan skje munnleg til styrar. Prisen på einskilddagar blir fastsett av kommunestyret.
Kommunen sine betalingssatsar gjeld for heile dagar (9,5 timar).
16.2 Opningstid
Utgangspunktet for barnehagane er at opningstida er frå kl. 7.00 – kl. 16.30, men denne kan variera frå barnehage til barnehage.
Ved behov grunna turnusarbeid eller lang reiseveg til jobb kan føresette søkja om utvida opningstid. Ein kan då få tilbod i barnehagen 15 minutt før (06.45) eller 15 minutt etter (16.45). Turnus til begge føresette må i dette tilfellet leggjast fram. Det ligg til grunn at det likevel er 9,5 timar som er tilbodet også denne dagen.
I barnehagar med færre enn 10 snittplassar kan styrar etter drøfting med samarbeidsutvalet koma fram til redusert normalopningstid.
Informasjon om opningstida skal gis på den enkelte barnehage sin heimeside.
Barnehagane har 5 planleggingsdagar i året, på desse dagane er barnehagane stengde. Informasjon om kva dagar barnehagen skal ha stengt skal føresette få beskjed om innan nytt barnehage-år.
Barnehagane stengjer kl. 12.00 julaftan, nyttårsaftan og onsdag før skjærtorsdag.
16.3 Ferie
Barna skal ha 4 veker ferie kvart barnehage-år. Av desse må minst 3 veker vera samanhengande i løpet av Suldalskulen sin sommarferie.
Føresette leverer melding om barnet sin ferie seinast innan 20. april.
Ved ferieavvikling i barnehagen sin sommarferie kan barnehagen vurdera å halda stengt dersom det er veker med færre enn 5 plassar. Foreldra skal få informasjon om kva veker dette gjeld seinast 1. mai.
Onsdag før skjærtorsdag, julaftan og nyttårsaftan kan barnehagen i samråd med foreldra vurdera å halda stengt dersom det er færre enn 5 plassar. Foreldra skal få informasjon om dette seinast 2 veker før.
Barnehagen kan og vurdera om det er mest hensiktsmessig å stenga faste veker i sommarferien, dersom ein tradisjonelt sett ser at det pleier å vera veker med færre enn 5 plassar. Foreldra skal få informasjon om kva veker dette gjeld seinast 1. februar.