Hjelp til deg som utøver vald

Å innsjå at du utøver vald eller har problem med å kontrollere temperamentet, er første steg mot endring. Det finst tenester som kan hjelpe deg med å handtere sinne og vald, slik at du kan skape eit tryggare miljø for deg sjølv og dei rundt deg. Anten du er ung eller vaksen – det er aldri for seint å søkje hjelp og gjere ein positiv endring.

Utset du nokon for vald?

Alle som står nær kvarandre kan krangle og vere usamde. Men det skal ikkje vere slik at du gjer partneren din eller barnet ditt redd eller utrygg. Livet i ein familie skal vere trygt for alle. Det skal gå an å ha eigne meiningar og ønskje noko anna enn den du bur saman med.

Slår du, sparkar, truar, ydmykar, krenker eller kontrollerer andre, utøver du vald. Har du problem med å kontrollere temperamentet, eller skremmer du stadig nokon du eigentleg er glad i, kan du få hjelp til å endre deg.

Få hjelp

Kranglar og bråkar de mykje heime? Har du problem med å kontrollere sinnet ditt, eller utset du partner eller andre i familien for vald eller overgrep? Då kan du ta kontakt med:

Skulehelsetenesta og helsestasjon (under 18 år)
Fastlegen: Fastlegen hjelper med både fysisk og psykisk helse, og har ansvar for heilskapen. Han kan vere ein god samtalepartnar og har erfaring med å møte folk som har det vanskeleg.
Familievernkontoret
Stiftelsen Tryggere
Det finst hjelp (for vaksne med seksuell interesse for barn)
Mannstelefonen: 22 34 09 60 (måndag–torsdag kl. 17.00–20.00). Telefonen er for menn som slit.
Sinnemeistringskurs ved Valen sjukehus

Publisert 05.12.2025 11.14